Menjobak musim ko sawah

Bilo padi mulo masak, sawah sekitar sungai tangjompo menguning macam lautan omeh yang mengilau mato momandang. Itulah ketiko ae oghang kampung sonyum lebar bilo ponek lolah hampir mombuahkan hasil. Pagar-pagar sawah dipokomehkan biar susah kobau lombu nak masuk. Kok tak ado kawat duri mako buluh-buluh yang dicaghi oghang.

Bughung pipit uban mulo berbondong mengisi tompolok. Itulah rozoki untuk sumo tapi mano yang tak sabar mau naik beghang tongkok padi abih digayut pipit uban. Pipit uban memang cantik sobab bulu kopalo ae putih dan badan meghah ati. Sokali toghobang macam lobah balik ko saghang.

Bobudak mulolah buek jobak dari polopah pokok rumbia. Polopah yang dah tuo warno kuning peghang dan dikupeh kulit untuk dapekkan bahagian dalam. Lidi-lidi dari buloh dipipih molek buek jejari atau dinding jobak. Reko bontok jobak kono kreatif, kito boleh reko jobak banyak bilik dan bertingkat-tingkat. Setiap bilik dibuek pintu atau tingkap yang dipasang kekunci untuk memerangkap bughung. Setiap bilik atau petak disangkutkan juntaian padi masak. Sangkut jobak kek dahan-dahan pokok topi sawah. Jobak onam boleh pintu memang cantik tapi bukan sonang nak buek bondo ni.

Bughung yang tertangkap akan disimpan dalam jobak induk. Setakat 20 ko 30 ekor pipit uban sonang-sonang dapek. Ado berjual boli pipit uban. Sombolih guno pisau lipat atau guno sombilu buluh. Lopeh tu siang dan kelenset kulit kopalo bughung. Kopalo pipit uban pun macam kopalo Tok Kodo yang botak licin. Bolah poghut buang isi poghut. Lumur dongan garam dan sorbuk kunyit. Lopeh tu panggang ateh dapur kayu api atau digoreng. Panggang biar merah garing. Kalau omak masak lomak cili api campur bolombing laie sodap, pekono pulak ulam potai.. omak aii bopoluh daie.