Bulan Poso

Dulu-dulu kok poso kono tahan dugaan. Kekadang kito yang kocik poso tapi abang-abang yang lain tak poso. Lopeh tongah aghi paneh, maso tu tokak bukan kemain dahago. Kok nampak air peghigi pun sodap bona tu. Ghamai yang ngajar, maso jirus kepalo tu ambik peluang menogok air. Kok macam tu lobih baik minum yo kek timbo. Apolak nak nyughuk menipu namo ae tu.

Sobolum buko, kok jumpo limau masam dan biaweh mudo- omak ai bukan main keliur laie. Pocahkan lado dan taghuk kicap buek pencocah ae. Bacang mudo topi jalan Tangkogheng jadi mangso pembaeh bobudak yo. Maso dulu kek kampung, nak berbuko makan sodap tak ado. Sehabih kuek pun kuih bosopang goreng, lopek pisang dan pongat. Kok dapek sikit air nyigho atuk Kodo bukan kopalang sodap. Oghang tau kalau atuk Kodo ngambek nyigho buek gulo anau, mesti ludah-ludah sikit ko baldi tu sobab petuo ngambik nyigho.

Lopeh tu, atur pembukoan tu dan bersilo ghapat-ghapat. Bilo donga yo azan kek radio atau kotokan tabuh masjid.. samba air sekole bosa. Gup.. gup... capai apo yang ado. Lopeh tu tersanda kokonyangan. Buah limau masam dan kok bacang mudo tadi sumo tolak topi. " Bosa ontak" Omak cakap. " apolak tak abihkan buah tu...?"

Ado satu potang, lopeh ngaji tu atuk Keghajo cakap malam tu sombahyang terawih kek masjid. Maso tu jarang oghang tuo poie terawih. Abih yo berbuko, kami adik beradik pun berduyun ko masjid Tengkek. Malam pulak bukan kemain golap. Sampai kek topi jalan masjid, kito oghang nampak kelibat kengkawan tongah main berlari dalam masjid, ghaso-ghaso ae lampu minyak api dah terpasang. Apo laie, sumo bokojalah ke masjid. Malang ae, bilo sampai kek pintu masjid tu bergolap pulak.. kito oghang ingat kok bebudak tu menyughok ko.. suluh punyo suluh dongan celait ( touch light) sunyi sopi yo.

Perasaan takut pun sampai, adik-adik yang lain iaitu Sarin, Iyah, Ijai serta sedagho lain mulo bukak langkah seghibu.. oii jangan laghi, kang kok aku baeh dongan celait ni kang!! bilo sumo tak donga arahan, aku pun bodobut laghi keluar. Esok ae, kito cakap dongan Atuk Keghajo pasai kejadian malam tu. Ghupo ae Atuk tak jadi poie masjid sobab poghut dio momuleh. Apo tu tuk? Atuk cakap, " Jin agak ae tuu.."

Omak cakap kalau dapek abihkan poso, dio nak buekkan baju melayu baghu. Mak wo Liah akan buekkan baju tu. Seronok boto dan tak sabar nak nunggu baju tu siap. Se aghi bolum ghayo, Mak wo pun soghahkan baju tu kek topi pagar.. bilo dipakai, astaga... sobolah belakang baju terjongket pulak.. omak pujuk.. tak apo.. kalau pakai sampeng kang, tak nampaklah tu...

La ni, anak-anak momileh bona kalau kito nak bolikan baju ghayo. Kok tak kono di ati, mulolah menghajuk. Maso nak berbuko sumo yang terjual kek pasar ramadhan sumo nak diboli. Bilo tak abih buang kek ayam.

Along ado buek meghiam buluh kek belakang ghumah. Buluh meghiam tu jenih buluh tuo dan muncung buluh diikek dongan dawai. Bia kotat mengelakkan pocah. Taghuk tin milo atau tempurung kek mulut menghiam buluh tu, bilo dimasukkan kebait dan mengologak bunyi ae.. cucuh dengan api. Bummmm.... melayang bonda alah tu. Kalau ado yang membaleh mako berlawan-lawanlah main menghiam buluh.